 |
|
BDSH reagon për dënimin e kryetarit të Alternativës Kombëtare
 Shkup, 5 shkurt - Bashkimi Demokratik Shqiptar (BDSH) ka reaguar të premten ndaj dënimit të tre pjesëtarëve të ish-UÇK-së, në mesin e të cilëve edhe kryetarin e Alternativës Kombëtare, Harun Aliun, me burgim te përjetshëm. “Dënimi paraqet edhe një aksion në vazhdën e aksioneve të dhunës dhe terrorit antishqiptar përmes të cilave Qeveria e Maqedonisë, së bashku me gjyqësinë të komanduar nga vetë ajo, tenton të ngjallë revoltë të përmasave të mëdha vetëm e vetëm që destabilizimi eventual i vendit t’u faturohet shqiptarëve”, thuhet në një komunikatë të BDSH-së. Sipas këtij subjekti politik, aventurat e këtilla të institucioneve shtetërore të ndihmuara nga partitë politike shqiptare bashkëqeverisëse, dëshmojnë se politika dominante e institucioneve shtetërore të Maqedonisë konsiston në humbjen e gjurmëve të vërteta apo paraqitja e tyre nga perspektiva që u konvenon. Të vetëdijshëm se hetuesia maqedonase përdor të gjitha mjetet e dhunës kundër të akuzuarve për vrasjen e policit Markovski, BDSH-ja kërkon nga partneri shqiptar i koalicionit – BDI-ja të rikujtoje deklaratat e gjoja garantimit të procesit të drejtë gjyqësor. BDSH-ja kërkon nga institucionet ndërkombëtarë dhe në veçanti nga OSBE-ja që të sensibilizojnë institucionet demokratike në botë për domosdoshmërinë e krijimit të një komisioni të pavarur ndërkombëtarë për të hetuar të gjitha rastet e proceseve gjyqësore të montuara dhe të lirohen të gjithë njerëzit që mbahen padrejtësisht nëpër burgjet e Maqedonisë. Ndryshe, Gjykata Penale e Shkupit, të enjten, u shqiptoi dënime të rrepta për Harun Aliun, Ismail Akemin dhe Bashkim Bajramin për vrasjen e policit të njësive speciale “Tigrat”, Zoran Markovski. Sipas akuzës, ata ngarkohen se më 3 janar të vitit 2008, në lagjen Autokomanda të Shkupit, kanë sulmuar xhipin e policisë, në të cilin gjendeshin Markovski dhe katër policë të tjerë. Sulmuesit, sipas akuzës, me vrasjen kanë dashur të hakmerren për aksionin policor “Stuhia malore” në Brodec të Tetovës. Nga plagët e marra Markovski vdes në vendin e ngjarjes, ndërsa kolegët e tij marrin plagë të rënda. I akuzuari i katërt Bekim Dardhishta është dënuar me tre vjet heqje lirie për shkak se ka ditur për sulmin kundër xhipit të policisë, por nuk e ka denoncuar. Policia ka arrestuar vetëm Akemin, ndërsa dy të dënuarit tjerë - Harun Aliu dhe polici Bashkim Bajrami gjenden ende në arrati. / Zhurnal / / Tv Era / |
|
|
|
|
|
| kthehu pas |
|
|
|
